ديليميزين مدافعه كميته­سينين باشچيسي آنام

                                                                        سعيد موغانلي

يوسيف خيال اوغلو دئميشكن:

"اوچ آغيز، اوچ اورك، اوچ آند ايچميش فيشك"

حسن بَي دميرچي تبريزده، عابباس ليساني اردبيلده، غلامرضا اماني

تهران زيندان­لاريندا آذربايجان توركلويونون مدافعه مثلثي­ديرلر.

كيمدنسه ائشيتميشديم اصيل قهرمان زينداندا اومالي، سورگون ائديلمه­لي يا دا تورپاق

آلتيندا ياتمالي­دير.

ايندي ايسه بيزيم سياستچي­لر آذربايجان مظلوميتيني ايران زيندان­لاريندان باغيريرلار.

باشقا بير سئودييميز ليدر بويورموشدو كي: ظولم عصرينين سياسي­لري زيندان­لاردا

 بيشمه­لي­ديلر. و بيز ايلده يوزلرلهسياسي دوستاق­لاريميزلا گله­جه­يه اوميد بسله­يريك.

آرخايين­لاشيريق. نه­سه تأسوف­لرله ، زينداني­لريميزله باشيميزاوجالير، خوشبختليكله.

***

نه­سه آشاغيدا اوخوياجاغينيز، شعر دئييل. تكجه آواره بير شاعيرين اوره­ك كپي­سي­دير.

"اوچ آغيز، اوچ اورك، اوچ آند ايچميش فيشك"

«حسن دميرچي، عابباس ليساني، غلامرضا اماني» يه پاي اولسون دئيه:

***

گونشي سومورموش دئودير او

پوسقولاردا گَرنشن چاققال­لاري اوركودور دمير يومروق­لاري

و كسيلي ديليندن آخان بال­لا

                    يوخلادير جيرتدان  بالالاري

بئله كؤيره­ك

                  بئله سَرت­دير ساوالان دَده

حضرت عباس آديلا بَزه­يبسه

                              بيزيم اردبيل

    اؤيله غئيرتلي­دير آغام بالاسي

عربجه لسان­دير

                          كسيلي عوصيان

 توركجه ميزده لئيسان­دير

                          شيديرغي طوفان

اؤزگورلويه دوغرو

                 زيندان­لاري ياشادان آذربايجان

زينداندا،  زيندان اؤلكه

                 و زيندان گؤزه­­تچي­لرينه ساري تيكان

                                      بيزيم قاراجا اوغلان

گؤزلري دؤيوشه « چاغري»

          و موقاومت آفيشي­دير

             حياتا قاداغان دئموكرات.

***

گئرچك سئوگي

        بير- بيريني سئومه­سيدير اينسان­لارين

او آزادليق بيبَري­دير

مئشه سوكوتونون جومرود آسلاني اودير

        دوغرانديقجا مئشه انگينلييي باغيرير آسلان

                     تورمه­لر دوشگونو بير اينسان

       21 – اينجي عصرده آجليق كئچيرير

و باشقا اينسانجيق اليله يومروق­لانير

                                او دومرول او سوبات

                                او«يورغون دئموكرات»

او پيشه­وري نين باش فدايي­سي

او فريدون،  او چاغري بَي، او ائلچي بَي

او ائكيزلر شهيدلرينين ناحاق قاني

 او خرداد حماسه­سينين دؤيونن آني

او قارداشيم،  او آنام

او ديليميزين مدافعه كميته­سي نين باشچي­سي آنام.

او محكمه اوتاق­لاريندا هيجان 

اونون آدي اويانيش، آدي آذربايجان

اونون آدي ديلسيز مستعمره

                 طالعسيز دره

او ساده جه بير اينسان

     ان عادي اينسان

او آذربايجان دئيه دؤيونن اوره­ك­لرده

    باش بوغوموز

                       باش قهرمان

او ساوالان آياق­لاريني اؤپن

                   آراز ياناق­لاريني

او حئيران گدييينده دولاما حيات­دير

                   اونون آدي اسكي قازامات­دير

                   او زيندان­لاردا دا دموكرات­دير

***

يومروغو 70 ميليون نيفرت

                   گؤزلري 70 ميليون اؤزگورلوك

آغيزي 35 ميليون قاداغان هاراي

او توركلويون « هاراي، هاراي من توركم» هارايي­دير.

35 ميليون زنجيرلي قوچ

     35 ميليون يارالي قورد

          35 ميليون قادالي قيلينج

              و 35 ميليون اوخلانميش قورآن.

او اوغوز ائل­لريندن بوياناكي تاريخين خولاصه­سي­دير

آوروپا دا جان  وئرن آتيلا

                                  ارمنيستاندا ساتيلان

                                             باغداددا دوغرانان بابك.

و تهران خيابان­لاريندان گولـله­له­نن

                               توركلوك سرداري ستار اوغلو عابباس

پيشه­وري بابانين آياق يالين فدايسي­دير البت

                             « اؤلدو واردي دؤندو يوخ»

                             « يا آزادليق يا اؤلوم»

آزادليق تهرانسيز دا اولور البت

اردبيل خيابان­لاريندا سئومك ده اولور سئويلمك ده

 سرعين­ده هانسي­سا سئوگيلي ايله ياللي گئتمك ده

***

 تبريز كي دئمه :

« آغ دَوه دوزده قالدي

                                      يولو آرازدا قالدي

                                       توي توتدوق اردبيلده

                                        ياريم تبريزده اؤلدو»

بئله­جه خزرده باتميش آي

آيدا گولـله­له­نن آيدا

و آيدا، اماميه­ده

                               آي دا

***

قوي بالالار آنا دئسين، آنالار جانا

«بابا آب داد»  نه­يه گره­كدي

                        اوختاي دئيير: -« آتام زينداندادير»

« بابا نان داد» چتينه دوشموش

                      آتيلا يازير: -« آتام زينداندا آجليق چكير»

و سئودا خانيم بالاجا ال­لريله گونده آتاسينين قانلي كؤينك­لريني اوتوله­يير

و اوتاقدا سينميش قاپيني،

                   جيريلميش كيتاب­لاري،

                                            اَزيلميش كامپيوتري گؤردوكده

دئيير: -« آنا جان بلكه عابباس آتامي آپاريبلار حاققيني وئرمه­يه!!!»

                               ************************

موغانلي سعيد

باي بَييميز بابَكين دوغوم گونو  ياي 1385

* اوختاي، آتيلا و سئودا خانيم،  عابباس بَي ليساني­نين بالاجا اوشاق­لارينين آدلاري­دير